Unpad Ngaresmikeun Ngadegna Center for Sustainable Development Goal Studies

[Unpad.ac.id, 20/05/2016] Universitas Padjadjaran ngaresmikeun Center for Sustainable Development Goal Studies atawa SDGs Center nu dipiharep bisa digawé sahadé-hadéna supaya agénda pangwangunan anu manjang bisa kahontal pikeun Indonésia anu adil palamarta dina mangsa nu bakjal datang. Acara ieu diayakeun di Grha Sanusi Hardjadinata Unpad, Jln. Dipati Ukur 35 Bandung, Jumaah (20/05).

Diréktur SDGs Center Unpad, Prof. Armida S. Alisjahbana, inohong pangwangunan anu manjang Prof. Emil Salim, jeung para Wakil Réktor Unpad ngaresmikeun ngadegna SDGs Center Unpad di Grha Sanusi Hardjadinata Unpad, Jumaah (20/05). (Foto kénging: Tédi Yusup)*

Diréktur SDGs Center Unpad, Prof. Armida S. Alisjahbana, inohong pangwangunan anu manjang Prof. Emil Salim, jeung para Wakil Réktor Unpad ngaresmikeun ngadegna SDGs Center Unpad di Grha Sanusi Hardjadinata Unpad, Jumaah (20/05). (Foto kénging: Tédi Yusup)*

SDGs Center diresmikeun ku Wakil Réktor Widang Riset, Pengabdian Kepada Masyarakat, Kerja Sama, Inovasi, jeung Usaha Unpad, Dr. Kéri Lestari, S.Si., MSi., Apt ngawakilan Réktor Unpad, disarengan ku Prof. Emil Salim, Prof. Armida S. Alisjahbana, jeung Wakil Réktor Unpad di Grha Sanusi Hardjadinata.

“Ngadegna SDGs Center téh salah sahiji léngkah parobahan Unpad ngajugjug universitas generasi katilu anu jadi knowledge hub sarta leuwih réa méré maslahat ka masarakat,” ceuk Dr. Kéri Lestari.

Dina ngarojong SDGs, ceuk Dr. Kéri, Unpad ngamimitian tina kapentingan kota, kabupatén, jeung provinsi di Jawa Barat ngaliwatan program Unpad Nyaah ka Jabar nu dipharep bisa mangaruhan kana tingkat nasional jeung global.

Dina pangbagéana, Diréktur SDGs Center Unpad, Prof. Armida S. Alisjahbana nyebutkeun, ngadegna SDGs Center téh ku alpukahna Réktor Unpad, Prof. Tri Hanggono Achmad, anu maliré pisan kana pangwanguna anu manjang. “Salian ti éta, SDGs ogé geus jadi komitmen sakumna nagara di dunya,” ceuk Prof. Armida, Guru Besar Unpad anu ayeuna jadi panasehat indepénden PBB pikeun SDGs.

Diréktur Eksékutif SDGs Center Unpad, Dr. Arief Anshory Yusuf, ngadadarkeun, udagan SDGs Center Unpad téh ngahasilkeun rékoméndasi kawijakan anu dumasar kana panalungtikan, sarta ngahasilkeun inovasi jeung strategi pikeun ngahontal, ngawaskeun kamajuan SDGs sacara indepénden; ngagugulukeun SGDs dina panalungtikan jeung kawijakan; sarta nyadiakeun fasilitas dialog jeung nu baroga kapentingan. Eta udagan téh kabéh ogé pikeun ngahontal implengan SDGs Indonésia dina taun 2030.

Sabada ngaresmikeun SDGs Center, acara ditéma ku diskusi panél anu ngaguar inohong pangwangunan anu manjang ti Universitas Indonvsia, Prof. Emil Salim, jeung Diréktur King’s International Development Institute ti King’s College London, Dr. Andy Sumner, jeung moderator Diréktur Kerja Sama Unpad, Dr. Parikesit. *

Website SDGs Center Unpad, kunjungi http://sdgcenter.unpad.ac.id/

Warta ti: Erman