Mahasiswa Asing Aub kana Unpad Summer Program 2017

[unpad.ac.id, 7/08/2017] Aya 31 urang mahasiswa asing anu aub kana  Summer Program nu diayakeun ku Universitas Padjadjaran ngaliwatan Diréktorat Tata Kelola jeung Komunikasi Publik/Kantor Internasional. Acara ieu diayakeun ti tanggal 2 nepi ka 9 Agustus nu bakal datang di Kampus Jatinangor, Kota Bandung, jeung Tamanbumi Nasional Ciletuh-Palabuhanratu, Kabupatén Sukabumi.

Sajumlah mahasiswa asing dina Unpad Summer Program 2017 katut tim Asésor UNESCO di Gedong Puslit Geopark jeung Kebencanaan Geologi Unpad di Kacamatan Suradé, Sukabumi, Kemis (03/08). (Foto: Tédi Yusup)*


Mahasiswa asing ieu asalna ti Guangxi University for Nationalities Republik Rakyat Tiongkok, Utsonomiya University Jepang, sarta mahasiswa asing nu keur kuliah di Unpad, diantarana ti Madagaskar, Tanzania, Kolombia, Bangladésh, jeung Yaman.

Ngaguar jejer “Sustainable Development: Improving the Quality of Life of Coastal Village”, kagiatan Unpad Summer Program ieu dieusian ku pidangan jeung sawala ti sababaraha panyatur, nganjang ka sababaraha tempat anu geus ditangtukeun, jeung perlombaan.

Kawasan Tamanbumi Ciletuh-Palabuhanratu dipilih mareng jeung jadwal pamariksaan ku tim Asésor UNESCO di ieu tempat. Tim Asésor UNESCO ogé patepung jeung peserta Unpad Summer Program di Gedong Pusat Penelitian Geopark jeung Kebencanaan Geologi di Kacamatan Suradé, Kemis (03/08).

Leuwih jauhna deui, tujuan tina Unpad Summer Program téh pikeun ngaguar kabeungharan budaya jeung kaéndahan alam nu aya di Jawa Barat. Bareng jeung pamariksaan di Geopark Ciletuh-Palabuhanratu, peserta Summer Program dipiharep bisa milu nyambuangkeun tamanbumi ieu ka tingkat internasional.

Supaya leuwih euyeub, peserta ogé diabringkeun ka tempat  wisata di Kota Bandung, saperti Musieum Konférénsi Asia Afrika, Workshop Batik Komar, jeung Saung Angklung Udjo.