Réktor miwah Bupati Garut Ngaresmikeun Universitas Padjadjaran Kampus Garut

[unpad.ac.id, 29/08/2017] Akademi Keperawatan Pemerintah Kabupaten Garut  kalayan resmi tos dipasrahkeun ngokolakeunna ka Universitas Padjadjaran. Éta pamasrahan téh dilaksanakeun ku Bupati Garut H. Rudy Gunawan, S.H., M.H., M.P., ka Réktor Unpad Prof. Tri Hanggono Achmad, Salasa (29/8) di Kampus Akper Pemkab Garut Jl. Proklamasi No. 5 Garut. Dina éta kasempetan, Bupati Garut ogé nada tangan Berita Acara Serah Terima Akper Pemkab Garut ka Kemenristékdikti.

Bupati Garut H. Rudy Gunawan, S.H., M.H., M.P., miwah Réktor Unpad Prof. Tri Hanggono Achmad, ngaresmikeun Universitas Padjadjaran Kampus Garut di Jl. Proklamasi No. 5 Garut, Salasa (29/8) ini. (Foto: Dadan T.)


Hal-hal anu dipasrahkeun dina Berita Acara Serah Terima téh ngawengku personél, sarana prasarana, alat-alat jeung mesin, taneuh, wangunan, kandaraan, pendanaan jeung dokumén.

Nanda tangan jeung masrahkeun Berita Acara Serah Terima Akper Pemkab Garut ieu téh diluuhan ogé ku Pupuhu Komisi D DPRD Kab. Garut Asép De Maman, Kepala Kejaksaan Negeri Kab. Garut, Mamik Suligiono sareng wawakil Kemenristékdikti, Hendra Wijaya sareng Sylvia Supartiningsih.

Hadir dina éta acara Dékan Fakultas Keperawatan Unpad Kusman Ibrahim, S.Kp., M.NS., PhD., Dékan Fakultas Pertanian Dr. Ir. H. Sudarjat, M.P., Direktur Sumber Daya Akademik jeung Perpustakaan Prof. Dr. Budi Setiabudiawan, dr., Sp.A-K, M.Kes., Direktur Sarana jeung Prasarana Dr. Irwan Ary Dharmawan sarta wawakil ti aparat pamaréntah Kab. Garut, para dosén, tenaga kependidikan jeung mahasiswa Fakultas Keperawatan Unpad di Kampus Garut.

Bupati Garut dina pangbagéana ngadugikeun, réhna ngapresiasi pisan pihak Unpad nu parantos sadia ngokolakeun Akper Pemkab Garut minangka neruskeun implementasi UU Nomor 23 Tahun 2014 ngeunaan Pemerintah Daerah nu teu masilitasan ayana Pendidikan Tinggi Diploma Bidang Keséhatan milik pamaréntah daérah.

“Simkuring saparakanca nganuhunkeun ka Unpad nu tos masihan kapercantenan ka Akper nu awalna dikokolakuen ku Pemda Garut dugi ka tiasa dikokolakeun ku Unpad. Pikeun lebet ka Unpad téh persainganna ketat pisan, ku ayana hal ieu tangtosna janten rahmat pikeun urang sadayana supaya bisa bagabung di Unpad,” saur Bupati.

Mairan kana éta hal, Réktor Unpad nétélakeun, réhna minangka perguruan tinggi nu dibabarkeun di lemah Jawa Barat, geus sakuduna Unpad ngamimitian ngabdina di sarakanna. Numutkeun anjeuna, kapercayaan jeung fasilitasi éta téh jadi wujud kayakinan urang sadayana pikeun bisa sabilulungan ngamekarkeun pangwangunan ngaliwatan ngabdi.

“Ku dipasrahkeunna ieu Akper, tangtosna jumlah mahasiswa Unpad nu ti Garut janten nu panglobana mun dibandingkeun jeung kabupaten séjén. Ieu téh minangka modal penting pikeun ngamekarkeun Garut dina mangsa kahareupna,” saur Réktor.

Réktor ogé ngémbohan, hadirna Unpad di dieu tangtosna baris nyanghareupan tangtangan anu kompléks. Mung Unpad geus komitmen pikeun jadi nu ngangangkat pangwangunan di Garut. “Ku hadirna Unpad di Garut, Garut kudu bisa leuwih maju deui”.

Saréngséna nanda tangan jeung pamasrahan Berita Acara Serah Terima téh, tuluy Réktor Unpad ngaresmikeun Universitas Padjadjaran Kampus Garut kucara muka lalangsé sasarengan miwah Bupati Garut.

Acara salajengna dituluykeun ku ngaresmikeun asrama Balé Wilasa 14, 15, 16 nu dicicirénan ku ngagunting pita ku Réktor Unpad miwah Bupati Garut. Tilu asrama di éta lokasi téh baris ditempatan ku mahasiswa Keperawatan pada tahun kahiji.

Kanggo informasi, ieu Akper Pemkab Garut téh minangka konvérsi ti SPK Pemda Garut nu tos diadegkeun ti awit taun 1982 nu pernahna di Komplék Rumah Sakit Umum Dokter Slamet Garut. Ieu konvérsi lumangsung dina taun 1997. Ieu kampus nempatan lahan nu legana 9.603 m2 sarta  luas wangunan 2.586 m2 nu ngawengku gedong kantor, rohangan kuliah, aula, jeung asrama.

Tina palebah personél, pikeun dosen jeung tenaga kependidikan nu status PNS nuju diajukan pikeun alih status jadi PNS di Kemenristékdikti. Pikeun non-PNS mah baris jadi Pegawai Unpad Non PNS.

Pikeun mahasiswa heubeul mah bisa milih naha tetep di D-III atawa transfer ka S-1. Danget ayeuna, kacatet 406 mahasiswa heubeul anu milih pikeun transfer ka S-1 Keperawatan sarta 79 mahasiswa tetep milih D-III. Aya ogé mahasiswa anu pindah ka perguruan tinggi séjén atawa teu neruskeun kuliahna di Unpad. Sawatara éta, taun ieu Kampus Unpad Garut ogé geus narima mahasiswa anyar ngaliwatan jalur SBMPTN. Aya 72 urang mahasiswa ditarima di Fakultas Keperawatan Kampus Garut.*

 

Dilaporkeun ku Marlia