Sanajan Geus Diniléy, Panalungtikan Di Géopark Ciletuh mah Terus Lumangsung

[unpad.ac.id, 4/08/2017] Tim Asésor UNESCO Global Géopark (UGG) ngaréngsékeun runtuyan acara pangdeugdeugna di wewengkon Geopark Nasional Ciletuh-Palabuhanratu, Jumaah (4/08). Deugdeugan nu dikawitan ti ping 1 Agustus tukang téh tugasna nganiléy wewengkon Géopark Ciletuh-Palabuhanratu pikeun jadi wewengkon Géopark dunya versi UNESCO.

Guru Besar Fakultas Téknik Géologi Unpad nu ogé ketua Pusat Penelitian Géopark dan Kebencanaan Géologi Unpad Prof. Ir. Méga Fatimah Rosana, M.Sc., PhD, (katuhu), nalika ngajéntrékeun risét nu dilaksanakeun akademisi Unpad di wewengkon Géopark Ciletuh-Palabuhanratu di payuneun tim asésor UNESCO Global Géopark di Bumi Walagri Padjadjaran, Suradé, Kemis (3/08). (Foto: Tedi Yusup)*


“Insyaallah (ku ayana ieu pangroris), urang baris meunang sértifikasi. Éta hartina, urang bisa ngawangun standar dina ngokolakeun géopark nu hadé,” Saur Réktor Universitas Padjadjaran Prof. Tri Hanggono Achmad saréngséna acara paturay tineung jeung tim Asesor UGG di Aula Kantor Sékda Kabupatén Sukabumi, Jumaah (4/08).

Ilu biungna Unpad dina ngawangun wewengkon Géopark Ciletuh-Palabuhanratu terus dilaksanakeun ku Réktor. Nalika nganiley, Tim Asésor UNESCO ogé disarengan ku Guru Besar Fakultas Téknik Géologi Unpad Prof. Ir. Méga Fatimah Rosana, M.Sc., PhD. Malah mah, tim asésor ogé diajak pikeun linggih di Bumi Walagri Padjadjaran nu aya di kacamatan Suradé.

Langkung tebihna Réktor ngadugikeun, rupaning panalungtikan Unpad di Ciletuh, némbongkeun yén produk akademik Unpad diajén kalayan hadé. Ieu kontribusi ngajadikeun hiji kaunggulan pikeun Géopark Ciletuh-Palabuhanratu, nyaéta hiji-hijina wewengkon Géopark nu ngalibetkeun unsur perguruan tinggi.

“Dina Ngawangun Global Géopark teh (koncina) nétworking,” Saur Réktor.

Danget ieu, Unpad parantos ngabentuk Pusat Penelitian Géopark dan Kebencanaan Geologi nu dipingpin ku Prof. Mega. Ieu Pusat Unggulan Unpad téh dipiharep jadi rujukan pikeun mekarkeun élmu pangaweruh dina ngokolakeun sumber daya géologi, biologi, jeung budaya supaya bisa dimekarkeun ngaliwatan konsép ‘taman kebumian’.

Nilik kana poténsi Géopark Ciletuh-Palabuhanratu nu ditujukeun kana tilu aspék, nyaéta géologi, biodiversitas, jeung  kabeungharan budaya, Réktor baris komitmen yén aktivitas panalungtikan kudu terus lumangsung.

“Ieu risét kudu tetep didorong ku cara transdisiplinér,” Saur Réktor.

Tim asésor UNESCO nu nganiléy di Géopark Ciletuh-Palabuhanratu nyaéta Alexandru Andrassanu (Rumania), Soo Jae Lee (Koréa Selatan), sareng Advisor Global Géopark Nétwork Hanang Samodra. Salila nganiléy, tim diajak pikeun niténan sawatara lokasi poténsial di wewengkon Ciletuh jeung Palabuhanratu.

Di Bumi Walagri Padjadjaran, tim ogé niténan rupaning hasil risét civitas academica Unpad di wewengkon Ciletuh Palabuhanratu ti rupaning élmu pangaweruh. Hiji-hiji dijéntrékeun ku Prof. Méga ngeunaan wincikan jeung ‘luaran’ (produk panalungtikan) nu dihasikeun tina éta panalungtikan. Alexandru ogé kungsi muji kana aktivitas Unpad nu terus aktif ngayakeun panalungtikan di éta wewengkon.

Umumna mah. tim ngajénan pisan léngkah Pamaréntah Provinsi Jawa Barat, Pemkab Sukabumi, Unpad, jeung sadaya anu aya tumalina dina ngemekarkeun Géopark Ciletuh.

Dina pangbagéa acara paturay tineung, Alex ngungkabkeun, pangrorisna ka Ciletuh jeung Palabuhanratu téh jadi pangalaman nu mandiri. Rupaning kabeungharan poténsi géologi, alam, jeung budaya di Ciletuh-Palabuhanratu bisa jadi pangirut anu ahéng.

“Tim manggihan hiji wewengkon anu beunghar ku kaahéngan identitas, mung di Géopark Ciletuh-Palabuhanratu,” Saur anjeuna.

Dina éta acara paturay tineung, ogé diluuhan Wakil Gupernur Jawa Barat Déddy Mizwar, Bupati Sukabumi Marwan Hamami, ogé wawakil ti sawatara nu aya tumalina jeung mekarkeun Geopark Ciletuh.*